Home » Eventi, News

A sa sèria

18 settembre 2013

4x1_tenores3Salude a totu sos cantadores,

bos cumbidamus a benner a Orgosolo sa die 28 de cabidanni 2013 pro partetzipare a su jòbiu “A sa sèria” chi amus organizadu paris cun su sòtziu Tenore Supramonte, su Comune de Orgosolo e sos cantadores a tenore orgolesos.

Custu atòbiu est su primu e su prus mannu de 32 atòbios chi semus organizende in 32 biddas, pro s’atunzu e s’ijerru, cun su contributu de sa Regione Autònoma de sa Sardigna.

Comente narat su tìtulu “Jòbiu natzionale de sos tenores” a cust’atòbiu sunt invitados totu sos tenores de su Sòtziu Tenores Sardigna e sos àteros tenores mancari non siant iscritos. Gai mantessi sunt cumbidados a bènnere totu sos cantadores a tenore e totu sos apassionados sardos e furisteris.

Su 28 de cabidanni dae sas bator de merie sos tenores chi ant a cherrer partetzipare, ant a cantare in sas carreras e in sas pratzas de Orgosolo, chene costùmenes, cantende a piaghere issoro.

S’idea de su Sòtziu Tenores Sardigna est chi cada annu si fagat una manifestatzione manna che a custa, chi est sa festa de sos cantadores a tenore. In sos annos colados nos fimus atobiados in Ollolai, in Bitti e in Seneghe. Ocannu amus organizadu in Orgosolo pro onorare una bidda chi at semper connotu e pratigadu su cantu a tenore.

Comente est traditzione de su Sòtziu amus fintzas a chistionare de tenore, de limba sarda e de cultura sarda. A sas arrejonadas ant a partetzipare istudiosos sardos e fintzas 22 etnomusicolos furisteris, italianos e de àteras natziones.

Amus a registrare e filmare sas cantadas pro las pubricare in su situ nostru (www.tenores.org).

Si bi resessimus amus a fàghere sos discos (CD) puru.

E tando, benide a Orgosolo su 28 de cabidanni, a colare unu sero totu paris, a cantare e a divertire.

Su Comune de Orgosolo paris cun su Sòtziu Tenore Supramonte e sos àteros cantadores e apassionados ant organizadu pro acoluzire sa zente e pro cumbidare sa chena a totu sos cantadores chi ant a atobiare.

Su Presidente

Tore Ghisu